Ош тӱняшке ме кайыкиге семынак толына, сурт печеш кушкына, вийым погена. Жап шумеке, кайыкиге семынак шаланен пытена. Но нигунамат огеш мондалт шочмо-кушмо мӧҥгына, шӱм-чонна садыгак шупшеш шочмо вер-шӧрыш. 
«Кажне еҥ шке вожшым палышаш, тунам гына южшат тамлырак, мландыжат шергырак, илашат куштылгырак лиеш. Мый Морко мландем пеш йӧратем», - манын возен Ираида Букетова-Алвий, Морко рӱдӧ книгагудылан пӧлеклыме «Помни своих» книгаштыже. 
Шыжа тылзын 23 кечыштыже, кас велеш Ираида Аркадьевна Морко рӱдӧ книгагудо пелен краеведений секторыште шке лукмо книга презентацийым эртарыш. Книган комжым ончалаш гын, моткоч сылне пӱртӱсым почын ончыктымо, тыгак кугу патыр тумо родо-тукым корнывожым шуя, авторын эргыж ден ӱдыржын фотошт книган тӱжвал тӱсшым сӧрастарат. Тиде книгашке, Ӧтӧгӧн тукымын 15-ше курымжо гыч тӱҥалын, 12 тукым-вож кылым пуртымо, родо-тукым схемышт, фотографий ончыкталтын. Букетова-Алвийын каласкалымыж почеш тиде книга ныл ий погалтын, да Юрий Иванович Галютин Ялзак-Кумылзак, родо-тукыжо полшымышт дене савыкталт лектын. 
Поэт, туныктышо, мер пашаеҥ, журналист Аркадий Букетов-Сайн пелашыж дене ныл икшывым ончен куштен, йол ӱмбак шогалтеныт, нунын кокла гыч Ираида Букетова-Алвий ачажын творчествыжым умбакыже калыкыште шара. Поэт, илымыж годым кок книгам луктын шуктен гын, Ираида Аркадьевна ачажын возен кодымо рукописьше почеш эше кум книгам савыктен. 
Мутат уке, Морко мландын талантан ӱдыр-рвезышт Ираида Букетова-Алвий семын, тукым-вожым шымлен, калыклан палдарен шогат гын, мемнан марий калыкна умбакыжат илаш да чолга шӱдыр семын волгалташ тӱҥалеш. 
Краеведений секторыш тыгай поян книгам пӧлеклен кодымылан Ираида Букетова-Алвийлан кугу таум каласена. А лудшо-влакым у книгам лудаш ӱжына да вучена.