Книгагудышто поэт дене вашлиймаш – тиде ӱмыр мучкылан ушеш кодшо шарнымаш.

Ик тыгай амал дене поэзийым йӧратыше да аклыше-влак Морко рӱдӧ книгагудын ӱстел йырже чумыргеныт.

Вашлиймаш тӱҥалтыште марий серызе, сылнымутчо, журналист Татьяна Пчёлкина «Турня ешым ужатем» почеламутшым видео гоч устан, келге шижмаш дене йоҥгалтарен.

Морко рӱдӧ книгагудо системын вуйлатышыже Маргарита Семенова, верысе серызе Наталия Никифоровам эртыше юбилейже дене шокшын саламлен да шуко у оҥай почеламутым, умбакыжат кугу творческий сеҥымашыш шуаш тыланен.

Наталия Никифорова «Торасе шӱдырем», книгаже гыч «Шӱлык шыже» да эше икмыняр у почеламутшо дене палдарен. Морко кундемын самырык серызе Инна Алексеева шке почеламут корныжым сылнын лудын. Книгагудын чолга лудшыжо Галина Кузьмина шке йӧратыме почеламутшо дене погынымашым сӧрастарен.

Мероприятийышке погынышо-влак кок командылан шелалтын, «Кӧ писырак?», «Поэзий тӱняште», «Термин-влак», «Калыкмутым пале» конкурслаште шке усталыкыштым, чулымлыкыштым тергеныт. А «Шыжын поянлыкше» композиций почеш у почеламутым шочыктеныт.

Вашлиймашке видеосвязь дене самырык мурызо, сылнымутчо Алена Яковлева ушнен. Погынышо-влакым тыгай кӱлешан вашлиймаш дене саламлен да уло кумылын шыже нерген шке серыме почеламут корнылажым лудын пуэн.

Мероприятийын участникше-влак толшо уна-влаклан шуко йодышым пуэныт: кушто, кунам да кузе почеламут шочеш, кӧм йоратыме поэтлан шотлат.

Тыгай талантан еҥ-влак дене ме кугешнена, умбакыжат пенгыде кылым кучаш тӱҥалына. Марий поэзий умбакыжат вияҥеш, да у почеламутым возен шогышо-влак эшеат шукырак да шукырак лийыт манын ӱшанен кодына.