Ме пӱртӱс лоҥгаште илена, чоннам кандарена, таза кап-кылан кушкына. Пӱртӱс – тиде мемнан эн шерге поянлыкна, ужар сывын гай чодыра, ший гай волгалтше эҥер, кайыквусо, поян саска да чылажымат шотлен от пытаре. А пӱртӱсын эн шерге поянлыкше – тиде чодыра. Тудо мемнам эре шкеж деке ӱжеш, нимом ок чамане.

Экологий ийлан пӧлеклалтше Морко рӱдӧ библиотекын краеведений пӧлкасе пырдыжыште Кудряшова Татьяна Вениаминовнан теле, шошо, кеҥеж, шыже пӱртӱсым ончаш лиеш. Мутлан; кавасе пылже чывыигын мамык, пушкыдо пунжо гай веле коеш. Лышташан пушеҥгыла кокла гыч ладыра куэ ужар лопка лышташлаже дене сымыстара, а олмаже тугай чевер, кучен пурлын колтымет шуэш. Икманаш, чыла пашажат ончышын чоныштым савырат, пӱртӱс лоҥгаш логалметла чучеш. А стелажыште «Флора и Фауна Марий Эл» лӱман книга, журнал выставке сӧрастара. Тыште Марий Эл экологийын историйже гыч тӱҥалын республикысе поэт, писатель-влакын пӱртӱс нерген возымо произведенийшт дене палыме лийын кертыда.

Ӱшанен кодына: мемнан шочмо верна эреак мотор, чевер лиеш, а ме айдеме-влак тудым перегышаш, арален шогышаш улына. Чыландамат пагален, мемнан деке книгагудыш ӱжына.