Туныктышо да этнограф, краевед да музей вуйлатыше Тимофей Евсеевич Евсеевын (Евсевьев) (1887-1937) шочмыжлан 1 февральыште 130 ий теме. А вет тудо марий калыкын ик эн тале эргыже лийын. Калыкын илыш –йӱлажым, культуржым, фольклор гоч тудын кӧргӧ шонымашыжым ӱмыржӧ мучко шымлен да пеш кугу материалым поген коден.

Кугу Шале культур пӧрт пелен верланыше книгагудышто уста еҥым шарныме лӱмеш книга выставкым погымо. Тушеч лудшо-влак Т.Е. Евсеевын тошто марий калыкын ойпогыжо: йомак, ончык лийшаш пале, омо тогедыш, воштылтыш, тушто да моло пале нерген пален налаш лиеш.

Тыгак Купсола школышто мероприятий эртаралте. Библиотекарь Лилия Сергеевна Евсеевын «Илыш корныжо да пашаже» лӱман презентацийым ончыктыш.

Каласен кодымо шуэш, кызытсе самырык тукым Т.Е .Евсеевым пеш огыт пале, сандене чыландамат тудын нерген пален налаш Кугу Шале книгагудышко пагален ужына. Книгагудышто ыштыше пашаеҥ-влак самырык тукымлан, уста еҥ семын, марий шӳлышан лияш тыланена.