Шукерте огыл Шеҥше селасе книгагудышто верысе поэт да композитор Кузнецова Полина Семёновна дене вашлиймаш эртен. Вашлиймашышке лудшо-влак шукынак погыненыт. Полина Семеновна мурым возаш 1997 ийыштак тӱҥалын. Икана газетыште Анастасия Чемекован «Йуд мардеж» почеламут шинчажлан пернен. Почеламутын содержанийже келшен. Кечыгут шонкален коштын, вара вучыдымын сем лектын. Тыге икте почеш весе, кумшо. Чылаже 60 утла муро погынен. Полина Семёновна семым возымым хоббийлан шотла. Тидлан амалжат уло. Аваже, Ксения Александровна, балалайка дене моткоч сайын шоктен, туныктышо лийын. Ачажат, Семён Иванович, самырыкше годым почеламутым возгален. Полинан школышто тунеммыж годым, школышто Эврик Анисимов ден Аркадий Букетов туныктеныт. Аркадий Иванович сылнымут кружокым вӱден. Тушко Полинат коштын.
Полина Семёновна шуко жап йочасадыште воспитательлан пашам ыштен. Лач тунам республикыште «Самырык тукым» конкурс эртаралташ тӱҥалын. Ик тыгай конкурсышто Шенше школ гыч мийше ӱдыр-влак сылне семан кок мурым сцена гыч йонгалтареныт: Аркадий Букетовын мутшылан возымо «Куандаре, трай» да Геннадий Чемековын «Марий Пампалчым» - да тӱшкан мурымаште кокымшо верым налыныт. Тыге Полина Семёновнан лӱмжо йонгалтын. Тудо моло мурыжымат нине автор-влакын почеламутыштлан келыштарен. Кызыт Полина Семёновна сулен налме канышыште. Тудын возымо мурыжо-влакым йочасадыште мурат да верысе тӱвыра портын сценыж гыч йонгалтарат.