Шочмо кундем кажне айдемылан эн шерге. Изинек ме тыште вий куатым погена, уш-акылнам пойдарена, а кушкын шумекына, тудым аралаш ямде лийшаш улына. Кажне айдеме шке вер-шӧржым мокта, тудын дене кугешнен ила. Марий сылнымутнам шуко поэт, прозаик, драматург пойдарен шогат, поснак, тиде Морко кундемын талантан эргыже ден ӱдыржӧ-влак.
Арам огыл Морко мландым
«Талант памаш» манын лӱмдат.
Ятыр лӱмлӧ уста еҥже
Шочын-кушкын лач тыштак.
Кажне творческий шӱлышан айдеме, кеч изиш шке илышыжым литератур дене кылдымыж годым, сылнымут аланыш шке надыржым пышта. Перо йымачше лекше произведенийже-влак, шке верыштым налын, марий ойпогынам пойдарен шогат. Сандене, мутмастарын пашаже ты шотышто нимучашдымын шергакан, суапле. Кажне серышын пашаже - тиде посна тӱня, тудым шолын лекше изи памаш дене таҥастараш лиеш. Нуно мыланна, лудшо-влаклан, илышын моторжым, сылнылыкшым ужаш туныктат, осал деч эрнаш ӱжыт.
2018 ий Морко поэт писатель-влакын лӱмгечыштлан поян. Нунын лӱмеш Морко книгагудышто «Ший гай волгалтше Морко мут ярым» проект возалтын. Библиотека системын вуйлатышыже, Семенова М.Н. куснылшо шарнымаш статуйым Шале книгагудо-пашаеҥ-влаклан кучыктен. Тиде статуй идалык мучко лӱмлӧ-поэт писатель-влакын лӱмгечыштлан пӧлеклалтше мероприятийлаште символлан шотлалташ туҥалеш. Февраль тылзыште тиде статуй Эҥерсола лудмо пӧртыш кая.
Проект пашан тӱҥатышыжлан Кугу Шале книгагудышто Аркадий Иванович Букетов-Сайнын 85 ияш лӱмгечыжлан пайрем кече эртаралтын.
«Лишыл шерге мыланем нимо деч шӱмбел мландем» лӱман пайрем шуко уна-влакым поген. Талантан поэтын эн изи ӱдыржо – Шолнерова Галина Аркадьевна шке ешыж ден, пырля пашам ыштыше йолташыже дене эн вучымо уна лийыныт. Сулло журналистын тукым шӱжарже – Лобанова Зинаида Ивановна – Россий Федерацийын туныктымо пашан почетан еҥже, Кугорнымбал Шале школышто пырля тунемме йолташыже, туныктымо пашан ветеранже, Йогор-сола ял гыч Владимир Ильич Ильин, Эҥерӱмбал ялын палыме наука пашаеҥже Сергеев Олег Арсентьевич, Марий книга издательствын пашаеҥже-влак – сулло журналист Борис Алексеевич Шамиев, писатель Юрий Ильич Соловьев да Купсола тӱҥ школын туныктышо да тунемшыже-влак, ял калык толыныт.
Шарнымаш кечым Морко муниципальный районым вуйлатыше, районысо депутат-влакын погынын председательже Иванова Светлана Михайловна, Шале ялшотан илемын вуйлатышыже Николаев Сергей Леонидович поэтым поро мут дене шарнен почыч.
Российысе журналист-влак ушем член, Марий Эл республикын сулло журналистше, поэт, Морко мландын Эҥерӱмбал ялын эргыже Аркадий Иванович Букетов-Сайнын илыш-пӱрымашыже, паша корныжо, еш илышыже калык коклаште поро шарнымашым веле коден.
Ӱдыржо, Галинан, шарнымаш мутшо гыч Букетов-Сайн мут колыштшо эрге, полышым пуаш эреак ямде улшо иза, ушан тунемше, поро да тунамак пеҥгыде ача, ешыште ӱшанле пелаш семын пале лие.
З. И. Лобанова поэтын Ӧтӧгӧн тукым-вожын шарлен шогышо илыш-корныжым шымла да погынышо уна-влакым шке пашаж дене палдарыш.
О. А. Сергеев, Марий Эл республикын почетан наука пашаенже, шкежат Эҥерӱмбал Шале гыч, уста туныктышын тукым шольыжо лиеш. Тудо Марий Биографический Энциклопедийышке шке ялысе чолга эрге-влакын лӱмыштым пуртымо нерген палдарыш.
Туныктымо пашан отличникше – С.В. Петрова, А.Букетов-Сайным райкомышто пашам ыштыме жапше гыч шуко лудшо, еҥын кумылжым пален ужын пагален моштышо айдеме семын палемдыш.
В. В. Сорокина, Марий Эл республикын туныктымо пашан сулло пашаеҥже, шуко ий Купсола школым вуйлатен, сандене верысе писатель-влакын возымыштым шымлен шоген. Тудо палемдыш – Букетов-Сайн тукым Кугу Шале кундемыште эн кугу да виян.
Азъялыште илыше Михайлов Валерий Викторович тӱжем утла краеведческий материалым поген, тидлан Валентина Васильевна Азъял школ кӧргыштӧ музейым почаш кӱлешлыкше нерген йодмаш семын ойлыш.
Марий книга савыктыш пӧртын вуйлатышыже, Соловьев Юрий Ильич, печатлалтше у марий книга-влак дене палдарыш. У ий деч ончыч лекше, Миклай Казаковын 100-ияш лӱмгечыжлан савыкталтше «Муро – илыш, муро – вий» да шкенжын «Тумышан леведыш», «Запоздалый букет» книга-влакым Кугу Шале книгагудылан пӧлеклыш.
Пайремыш погынышо уна-влак Кугу Шале книгагудышто ыштыше, чолга, книгалан шӱман да лудаш таратыше Гурьева Алевтина Николаевна, Владимирова Лилия Сергеевналан, верысе «Ший оҥгыр» ансамбль, вуйлатышыже - Тимофеева Светлана Николаевналан да клуб пашаеҥ-влаклан кугу таум каласышт.