Кеч могай калыкын сылнымутыштыжо эн пагалыме кугу мастар писательже уло. Тыгайлан марий литературышто В. Колумбым, Олык Ипайым да эше икмыняр авторым шотлена. Но пӱтынь сылнымутым кок-кум мут мастар огыл, а нунын йыр улшо моло-влакат шке усталыкышт дене пойдарат. Морко районысо Элкеҥер ялеш шочын-кушшо поэт Мирон Чойнын (Большаков Мирон Николаевич) творчествыж деч поснат марий поэзийна, очыни, нужнарак лиеш ыле.
19 февральыште Эҥерсола тӱҥ школышто да книгагудышто Мирон Большаковын лӱмгечыжлан пӧлеклалтше пайрем кече эртыш. Книгагудо пашаеҥ-влак Морко рӱдӧ библиотеке гыч тӱҥалын, Эҥерсола ял марте ече дене миеныт. Тидлан кечыжат шыратен ончен да пушкыдо лум мланде ӱмбак велын.
Шереганово книгагудын пашаеҥже, Людмила Ивановна Михайлова уна-влакым кинде-шинчал дене вашлийын. Библиотекыштыже Мирон Большаковлан пӧлеклалтше книга-выставке, книгагудыж ден да шкежын пашаже нерген палдарен. Пайремын кокымшо ужашыже Эҥерсола школышто эртен. Презентаций почеш икшыве-влак Мирон Чойнын илышыже да паша-корныжо нерген каласкаленыт. Талантан писатель, журналист, Шереганово велын эргыже, Исаков Юрий Валентинович Мирон Большаковым шарналтен каласкалыш. «Ямде лий» газет редакцийын отдел редакторжо, Григорьева Людмила Николаевна писательым ужмыж да пелештыдымыж нерген чаманен ойлыш, самырык тукымым талантан писатель-поэт-влакым шарнен, пагален илышт манын каласыш. Тыгак пайрем кечым шарнымаш поро мут дене Чойнын тукымжо, Большакова Роза Николаевна палдарыш. Морко районысо книгагудын вуйлатышыже, Маргарита Николаевна Семенова, куснылшо кубокым Шале библиотеке гыч Шереганово библиотекылан кучыктыш да у книга-влакым пӧлеклыш. Авторын «Добрый Яндывай», «Ох, кугыза» поэма-йомакше почеш ямдылыме мультимедийный книгам Морко рӱдӧ книгагудо пашаеҥ-влак уна-влаклан ончыктышт. Коркатово библиотекын пашаеҥже-влак лудшо икшыве-влак дене «Суслик» басньым модын ончыктеныт. Тыгак Шереганово клуб пелен «Муро сем» ансамбль да Элекеҥер школын тунемшыже-влак Мирон Большаковын почеламутшо да мурыж дене пайрем кечым сӧрастареныт.