Август тылзын 27 кечыштыже «Ший гай волгалтше Морко мут ярым» проектнан кандашымше йыжыҥже книгам лудаш йӧратыше-влакым Кугу Шале книгагудыш Морко гыч велосипед дене кудалаш таратыш. Чыланат икгай футболкым чиен (нуным ме проектлан лӱмын ургыктенна), весела кумыл дене корныш тарванышна. Игечыжат пуйто мыланна куанен - кечыгут кече ончыш, а чодыра корно дене кудалаш путырак ласка лие, шагат жапыште миенат шуна.

2018 ий Морко районысо поэт, писатель-влакын лӱмгечыштлан пешак поян: январь тылзе гыч тиде – луымшо. Азъял ялысе кресаньык ешеш шочшо Элнет Сергейын (Сергей Архипович Краснов) 115-ше лӱмгечыжым палемдаш погынышна. Марий литературышто тудо «Илыш шолеш» повесть да икмыняр ойлымашын автор семын палыме, тыгак ялысе илыш нерген селькор семын шуко очеркым, статьям возен, «У вий»,«Арлан ден Кестен», «Йошкар кече» журнал да газетлаште савыкталтын.

1930-ше ийыште тудын вуйлатымыже дене «Колхоз йӱк» (кызыт «Морко мланде») район газет лекташ тӱҥалын.

Погынымашыш Элнет Сергейын тукым шӱжарже, Сошина Нина Александровна пелашыж дене Азаново села гыч толыныт. 2013 ийыште тудын тыршымыж денак «Элнет Сергей» книга ош тӱняш савыкталт лекте, серызын чыла гаяк произведенийлаже тиде книгаште иквереш чумыралтын. Нина Александровна тале родыжын марий калыкын ончыкылык верч пашам тыршен ыштымыжым сайын шымлен, архивла гыч материалым кычалын поген. Чаманен каласыме шуэш, 1937-ше ий декабрь тылзыште Элнет Сергейым контрреволюций пашам вӱда манын кучен наҥгаеныт да вес ий январь тылзыште лӱен пуштыныт. Ни пелашыже, ни шочшыжо нерген тылеч вара нимогай уверат уке.

Нина Александровна Сошина шкежат кок ойлымаш книгам савыктен, «Илыш икте, тудым акле» книгаж гыч «Кушто улат, эргым?» ойлымашыж почеш Морко библиотека пашаеҥ-влакын ямдылыме буктрейлерым ончышна, да книгажым шергална.

Николай Мухинын лӱмеш музей-пӧртын научный сотрудникше, Сошин Лев Александрович Элнет Сергейын да Николай Мухинын илыш-корнышт йыгыре кайме да иквереш пашам ыштымышт нерген каласкалыш. Нуно коктынат комсомол ячейкым вуйлатеныт, марий калыкын тунеммышт нерген шоненыт, 1935 ийыште пырля Морко медрабфакыште абитуриент-влакым ямдыленыт. Мухинын илыш-корныжо репрессий пуламырыштак кӱрылтын.

Лев Александрович ӱмыр мучко школышто туныктышылан ыштен, шкежат поэт кумылан, садлан возымо басньылажым («Ончыко» журнал, 2018 ий, 5№) лудын пуыш Вара комсомол организацийыште шогымыжым шокшын каласкалыш, оҥ кӱсенже гыч аралыме, самырык жап годымсо комсомольский билетым луктын ончыктыш.

Моло дене пырля велосипед дене Кугу Шальыш Морко район Кораксола гыч йоча писатель Владимир Егоров мийыш, тудат комсомол организацийын самырык-влак дене 70-80-шо ийлаште виян пашам ыштымым палемдыш, шке почеламутшым лудын пуыш.

Клуб вуйлатыше Тимофеева Светлана Николаевна да ӱдырамаш ансамбль пайремым сылне муро-влак дене сӧрастарышт.

Моркыш изишак нойышо, но кумыл нӧлтшӧ пӧртылна.